«ВаенТБ» апублікавала відэа з падрабязнасцямі здарэння на трасе М5 (Мінск — Гомель), што адбылося 11 траўня. Там дзеянні кіроўцы назвалі спробай нападу і паказалі яго твар.
Як расказаў закадравы голас, «кіроўца вялікагрузнага аўтамабіля ажыццявіў спробу нападу на групу вайскоўцаў, якія бяруць удзел ва ўзмацненні ўчасткаў дзяржаўнай мяжы».
Вайсковец у балаклаве і цёмных акулярах расказаў, што ён і ягоныя калегі «ажыццявілі прывал». У гэты час да іх пачала набліжацца фура. З кабіны кіроўца «выкінуў выбуховае прыстасаванне», і яно здэтанавала.
«Хлопцы ў размове паміж сабой сказалі, што не выкарыстоўвалі зброю толькі таму, што ніхто не пацярпеў. А калі б было інакш — кіроўцу б у палон не бралі», — расказаў закадравы голас на відэа.
А са словаў усё таго ж вайскоўца ў балаклаве, «адразу пасля затрымання было відаць, што кіроўца прытрымліваецца дэструктыўных поглядаў». У відэа «ВаенТБ» адзначылі, што прывезлі затрыманага ў Асіповіцкі РАУС. Ад Асіповічаў па трасах М5 і Е95 да ўкраінскай мяжы (новай Гуты) каля 250 км.
Нагадаем, раніцай 12 траўня ў Мінабароны Беларусі заявілі, што ўвечары 11 траўня на ўчастку трасы М5 (Мінск — Гомель) кіроўца вялікагрузнага аўтамабіля «ажыццявіў спробу нападу з выкарыстаннем выбуховай прылады, вырабленай з піратэхнічных сродкаў, на групу вайскоўцаў, якія бяруць удзел ва ўзмацненні ўчасткаў дзяржмяжы».
Як стала вядома пазней, мужчына мог выкарыстоўваць петарды «Звіздзец». У дачыненні да яго распачалі крымінальную справу па ч. 3 арт. 339 (Асабліва злоснае хуліганства) КК Беларусі.