Кампанія маладых людзей з Асіповічаў вырашыла адпачыць у Гродне. Самы ініцыятыўны хлопец сабраў ва ўсіх грошы, нібыта зарэзерваваў катэдж і ўнёс іншыя перадаплаты. Потым ён захварэў, а ўсе грошы прысвоіў. Чым скончылася гісторыя, расказалі «Мінск-Навіны» са спасылкай на афіцыйнага прадстаўніка Следчага камітэта Аляксандра Сухадольскага.
Кампанія маладых асіпаўчан збіралася адзначыць дзень нараджэння сяброўкі. Свята аднагалосна вырашылі арганізаваць у Гродне, бо менавіта там год таму яны прабавілі незабыўныя дні. Будучая імянінніца стварыла чат у мэсэнджары, дзе хлопцы і дзяўчаты амаль месяц абмяркоўвалі паездку. Сябры планавалі арандаваць катэдж на кароткі тэрмін.
За некалькі дзён да паездкі ў агульным чаце з’явіўся 22-гадовы малады чалавек, які быў знаёмы большасці. Хлопец падключыўся да абмеркавання і падахвоціўся дапамагчы з арганізацыяй. Ён зарэзерваваў катэдж і сказаў, што нібыта ўнёс за яго перадаплату. У сваю чаргу, практычна ўсе маладыя людзі перавялі яму грошы на картку, астатнія аддалі наяўныя. Незадоўга да выезду самаадчуванне хлопца пагоршылася. Пра гэта ён адразу ж паведаміў імянінніцы і аднаму з сяброў, з якім камунікаваў больш за ўсіх.
Кампанія ўсё ж паехала ў Гродна. Аднак пазней высветлілася, што катэджа ніхто не рэзерваваў і перадаплаты не ўносіў. Хлопцы і дзяўчаты зразумелі — прыяцель захварэў напярэдадні паездкі невыпадкова. Калі яны пачалі яму тэлефанаваць і пытаць, як магло адбыцца такое непаразуменне, хлопец паспрабаваў растлумачыць, што пераблытаў даты. Але пазней ускрыўся і гэты падман.
Вярнуўшыся ў Асіповічы, маладыя людзі спадзяваліся, што знаёмы верне ім грошы, але так і не дачакаліся. Таму звярнуліся ў міліцыю.
— Следчаму фігурант расказаў: ён не думаў, што прыяцелі звернуцца ў міліцыю, і з часам збіраўся вярнуць патрэбную суму. Дзеянні 22-гадовага жыхара раённага цэнтра кваліфікаваныя па ч. 1 арт. 209 (Махлярства) Крымінальнага кодэкса Беларусі. Малады чалавек кампенсаваў пацярпелым шкоду ў поўным аб’ёме. Суд прызначыў яму 180 гадзін грамадскіх работ, — расказаў прадстаўнік Следчага камітэта.