Ніколі ў гісторыі Беларусі не стаяла так востра пытанне захавання суверэнітэту і незалежнасці краіны. Пра гэта паведаміў 31 сакавіка Аляксандр Лукашэнка ў самым пачатку свайго паслання беларускаму народу і Нацыянальнаму сходу.
— Ніколі яшчэ ў гісторыі мы не падыходзілі да такой небяспечнай рысы, калі трэба надаць асаблівую ўвагу захаванню суверэнітэту і незалежнасці нашай краіны. Я маю на ўвазе нашую найноўшую гісторыю, — заявіў Лукашэнка.
Палітык паабяцаў падчас свайго паслання агучыць галоўныя ўмовы захавання суверэнітэту краіны і праз іх вызначыць задачы на гэты год.
— Пытанні, якія ставім, датычаць кожнага беларуса. Тэмы, якія абмяркоўваем, — ад жыцця. У цэнтры рашэнняў, якія прымаем, — імкненне да захавання міру, стварэнне на карысць будучыні Беларусі, сацыяльная справядлівасць. Гэта нашыя дэмакратычныя каштоўнасці, сапраўдныя каштоўнасці, — сказаў Лукашэнка.
Захад — кепска, тактычная ядзерная зброя — добра
Пасля такога ўступу Лукашэнка перайшоў да абвінавачанняў «нават не Захаду, а адной краіны» ў развязванні «ўсіх гарачых канфліктаў апошніх дзесяцігоддзяў». Затым паўтарыў крамлёўскія наратывы пра тое, што ўкраінцы самі вінаватыя ў тым, што Расія пачала поўнамаштабнае ўварванне, расказаў, як «сабачкам» бегаў ад аднаго прэзідэнта да іншага, каб усіх памірыць. Свой блок па Украіне Лукашэнка завяршыў заклікам сесці за стол перамоваў.
— У роднай нам краіне развязаная поўнамаштабная вайна! Да апошняга ўкраінца! У выніку замаячыла трэцяя сусветная з ядзернымі пажарамі! — сказаў Лукашэнка і заклікаў спыніцца, «пакуль не пачалася эскалацыя».
Палітык таксама прапанаваў спыніць баявыя дзеянні ва Украіне і прыгразіў, што Расія ужые «самую страшную зброю», калі адчуе пагрозу сваёй тэрытарыяльнай цэласнасці.
Затым Лукашэнка падкрэсліў, што сам папрасіў прэзідэнта Расіі Уладзіміра Пуціна «вярнуць у Беларусь ядзерную зброю», каб «забяспечыць мір беларускаму народу».
— Пад бізуном жыць больш не хочам і рабамі не будзем, — сказаў Лукашэнка.
Тры ўмовы суверэнітэту
Выказаўшыся па актуальных пытаннях, Лукашэнка перайшоў да галоўнай тэмы свайго паслання — умоваў, якія забяспечаць суверэнітэт Беларусі. Іх усяго тры. Першая — гэта народнае адзінства. Па-другое — гістарычная памяць і нацыянальныя традыцыі. Трэцяя — эканоміка. У кантэксце гэтых умоваў ён заклікаў чыноўнікаў «жыць па законе», актыўней прасоўваць беларускіх артыстаў, мастакоў, папулярызаваць нацыянальныя сімвалы, а таксама прытрымлівацца курсу сацыяльна арыентаванага развіцця.
— За суверэнітэт давядзецца плаціць. Мы яшчэ не пачалі [за яго] плаціць, — папярэдзіў Лукашэнка, падкрэсліўшы, што ўсё можна страціць у адзін момант.
Палітык даручыў штогод забяспечваць тэмп росту ў прамысловасці на ўзроўні 105−107%.
Лукашэнка падзякаваў заходнім партнёрам, якія ўвялі супраць афіцыйнага Мінска санкцыі.
— Дзякуй богу, што ўвялі. Для нас адкрыўся каласальны рынак: бяры і прадавай, што мы, дарэчы, і робім, але пакуль на 70%. 30% нам трэба дадаваць, і дадаваць тэрмінова, — сказаў Лукашэнка.
Пра ўсё
Таксама палітык заклікаў развіваць IT-сектар, але з упорам на патрэбы беларускай эканомікі. Пры гэтым ён заклікаў айцішнікаў распрацоўваць тавар, які «будзе запатрабаваны на патрабавальных замежных рынках».
— Парк высокіх тэхналогій трэба жорстка «варухнуць». Занадта яны зацыкліліся на санкцыях, ім бачыце цяжка… — выйшаў з сябе Лукашэнка.
Пад заслону эканамічнага блока ён запатрабаваў забяспечыць работнікам справядлівую зарплату і адысці ад «жлобства», прывесці ў парадак дарогі, знайсці свежыя рынкі для рэалізацыі прадукцыі, распрацаваць новыя лагістычныя шляхі.
Лукашэнка таксама заявіў, што ў Беларусі «ўсе, хто хоча і можа працаваць, працуюць і зарабляюць». Ён падкрэсліў, што лічыць паспяховым сваё рашэнне спыніць павышэнне цэн.
— Памятаеце, колькі было выцця і смуроду пасля прыняцця мною рашэння па цэнаўтварэнні: «павалімся, жэрці будзе няма чаго, заўтра ўсе схуднеюць так, што будзе скура ды косці». Хто схуднеў? Ну на мяне паглядзіце і ўбачыце, — сказаў Лукашэнка пад апладысменты. — А чаму вы апладзіруеце? Што я не худнею? Я займуся гэтым.
Лукашэнка прыгразіў «страсянуць ахову здароўя так, што пыл пасыплецца», і паабяцаў пільна вывучыць працу начальнікаў беларускіх медустановаў.
— Ніякія санкцыі не змогуць і не павінныя паўплываць на ўзровень нашага медабслугоўвання. <…> Калі хтосьці з начальнікаў непапраўна хворы, будзем лячыць. Але без партфеляў, — сказаў палітык.
Падчас выступу ён заклікаў чыноўнікаў узмацніць працу па размеркаванні матэрыяльнай дапамогі шматдзетным сем’ям — каб грошы атрымлівалі дзеці, а не «бацькі-алкашы», а таксама заклікаў усталяваць лавачкі ў праваслаўных цэрквах.
— У мяне гэты дыялог ідзе ўжо гадоў 20 з нашымі іерархамі. Ну што гэта такое, калі мы прыходзім у царкву, стаім калом там па дзве, па тры гадзіны: хто моліцца, а хто ўжо думае, хутчэй бы гэта ўжо скончылася. Ну пастаўце вы там лаўкі, хай людзі сядзяць!
«Ёсць нам пад каго класціся»
Яшчэ адной умовай захавання суверэнітэту Беларусі Лукашэнка назваў «незалежную замежную палітыку». Ён доўга тлумачыў, як ЗША падпарадкавалі сваёй волі ўсю Еўропу, каб яе разбурыць.
— Еўропа можа захавацца толькі з намі. Перш за ўсё — з Расіяй, — сказаў Лукашэнка.
Ён падкрэсліў, што не «клаўся пад Пуціна».
— Ёсць нам пад каго класціся. Мы яшчэ не зусім… — паціснуў плячыма Лукашэнка.
Палітык падкрэсліў, што «Беларусь — міралюбная краіна», але жыццё змушае «порах трымаць сухім»:
— Мы гатовыя да любога развіцця падзей. Тых, хто непакоіцца за мір і бяспеку ў нашай краіне, хачу супакоіць: нічога не бойцеся. Усё будзе нармальна. Мы будзем абараняць свет, а не разбураць яго. Любы замах на суверэнную Беларусь, нашую вайсковую і цывільную інфраструктуру, атрымаюць неадкладны адказ.
«Не трэба парыцца, што тут Расія нешта захапіла»
Падчас выступу Лукашэнка расказаў, што вучыць і забяспечвае ўсім неабходным расейскія войскі, якія размешчаныя ў Беларусі ў рамках рэгіянальнай групоўкі войскаў. І падкрэсліў, што менавіта ён папрасіў Пуціна адправіць свае падраздзяленні.
— З восені мінулага года на беларускіх палігонах на ратацыйнай аснове размяшчаюцца ўзброеныя сілы расійскай арміі. Войскі займаюцца баявой падрыхтоўкай, знаходзяцца ў гатоўнасці да сумесных дзеянняў па абароне нашай агульнай абароннай прасторы. І не трэба парыцца, што тут Расія нешта захапіла. Усе гэтыя расійскія падраздзяленні навучаюцца пяццюстамі беларускімі афіцэрамі. Праводзіцца баявое зладжванне, падрыхтоўка. Дзе трэба — узбройваюцца, матэрыяльна забяспечваюцца. Пад нашым камандаваннем.
Паводле Лукашэнкі, тактычная ядзерная зброя, якую Расія плануе размясціць у Беларусі, «у два-тры разы мацнейшая за тую, якую скінулі на Хірасіму і Нагасакі».
— Гэта страшная зброя. Ніхто і ніколі яе выкарыстоўваць як цацку не будзе. Акрамя амерыканцаў. <…> І не трэба сёння казаць: «Вось будуць толькі захоўваць, будуць яшчэ чагосьці там, гэта не нашая зброя». Гэта нашая зброя, якая будзе спрыяць суверэнітэту і незалежнасці, — сказаў Лукашэнка.
Завяршыў свой выступ палітык тэмай вяртання на радзіму беларусаў, якія з’ехалі па палітычных матывах. Ён заклікаў тых, хто хоча вярнуцца, не проста пісаць у камісію па вяртанні, але і прасіць прабачэння ў дэпутата Алега Гайдукевіча, прапагандыстаў Андрэя Мукавозчыка, Рыгора Азаронка і іншых.
Зачытаўшы сваё пасланне, Лукашэнка сеў за стол, каб адказаць на пытанні людзей з залы.