Дзяржаўны доўг Беларусі не перавышае 32% ВУП. Пра гэта заявіў Аляксандр Лукашэнка 15 сакавіка на сустрэчы з суддзямі, дэпутатамі парламента, палітычнымі партыямі ў Палацы Незалежнасці, якая прымеркаваная да 30-годдзя Канстытуцыі нашай краіны.
«Мы рацыянальныя ў фінансавых пытаннях, не дазваляем назапашваць і перакладаць свае даўгі на будучыя пакаленні. Наш дзяржаўны доўг не перавышае 32% ВУП. Не сакрэт, што ў шэрагу высокаразвітых краін гэты паказчык у разы вышэйшы», — заявіў Аляксандр Лукашэнка.
ВУП у цяперашніх цэнах у 2023 годзе склаў 216,1 млрд рублёў. То-бок дзяржаўная пазычанасць тады, мяркуючы з агучанай Аляксандрам Лукашэнкам адзнакі ў 32%, складае каля 69,2 млрд рублёў. Для параўнання: на 1 чэрвеня 2022 года дзярждоўг быў на ўзроўні 60,5 млрд рублёў, паведамляў Мінфін. З таго часу ведамства не публікуе такія звесткі. Гэтая сума складала 33% ад ВУП.
Нагадаем, чыноўнікі ў 2022 годзе засакрэцілі інфармацыю пра дзяржаўны доўг. Раней у 2021 годзе яны прызнавалі, што дзярждоўг стаў сур’ёзнай праблемай для эканомікі — «нарастае пазыковая спіраль, фактычна Беларусь знаходзіцца на мяжы пазыковай пасткі». Адна з прычын — уплыў уведзеных заходніх санкцый, удакладнялі ў Мінфіне.