Падчас сустрэчы міністраў замежных справаў краін NATO з журналістамі на ўмовах ананімнасці пагаварыў высокапастаўлены чыноўнік альянсу. «Люстэрку» ўдалося задаць некалькі пытанняў наконт заявы Валерыя Сахашчыка пра тое, што Беларусь і Расія рыхтуюцца напасці на Літву. Таксама чыноўнік расказаў, як NATO ацэньвае імавернасць далучэння нашай краіны да вайны на фоне словаў Лукашэнкі пра падрыхтоўку да яе.
Нагадаем, Валерый Сахашчык 24 сакавіка ў Варшаве сказаў, што Беларусь і Расія рыхтуюць планы па выкарыстанні ядзернай зброі і «бліцкрыгу на Вільнюс». «Я гэта дакладна ведаю», — сказаў ён, дадаўшы, што «беларускія генералы са сваімі калегамі з Масквы малююць стрэлкі на картах у бок Вільнюса». Пазней у каментары «Люстэрку» былы беларускі вайсковец удакладніў, што інфармацыю пра гэта ён атрымаў з «крыніц высокага ўзроўню» (праўда, не назваў якіх). І дадаў, што напад можа адбыцца ў ліпені-жніўні 2024 года.
Адказваючы на пытанне «Люстэрка», высокапастаўлены чыноўнік NATO сказаў, што не мае інфармацыі, якую паведаміў Валерый Сахашчык.
— У мяне няма ніякай непасрэднай інфармацыі з крыніцы, якую мы б лічылі дакладнай, — сказаў суразмоўца.
Мы таксама спыталі яго, як у Паўночнаатлантычным альянсе ацэньваюць магчымасць нападу Беларусі і Расіі на адну з краін NATO, у прыватнасці, на Літву.
— Вы ведаеце, што Уладзімір Пуцін разумее сілу абавязанняў NATO. Ён разумее абавязанні паводле пятага артыкула Статута (напад на адну краіну NATO лічыцца нападам на ўвесь альянс. — Заўв. рэд.). І я веру, што ён працягвае заставацца моцным і эфектыўным фактарам стрымлівання.
Журналісты таксама папрасілі чыноўніка альянсу ацаніць імавернасць далучэння Беларусі да ваеннай агрэсіі Расіі супраць Украіны з улікам правядзення вайсковых вучэнняў і праверкі баяздольнасці Узброеных сіл.
— Мы лічым, што Беларусь па-ранейшаму не мае намеру афіцыйна далучацца да вайны, — сказаў чыноўнік NATO. — Беларусь заявіла, што рухі ўздоўж мяжы носяць абарончы характар, і мы вельмі ўважліва сочым за гэтым. Лукашэнка мусіць разумець, што ўвесь цяжар санкцый, якія саюзнікі наклалі на Расію, у роўнай ступені ляжа і на Беларусь, калі беларускія войскі пачнуць весці наступальныя аперацыі супраць Украіны. Так што пакуль мы не бачым зацікаўленасці Беларусі ў рэальным уступленні ў вайну.
Ці могуць Расія і Беларусь супрацоўнічаць больш? Безумоўна. І гэта зноў жа тое, за чым мы вельмі ўважліва сочым. Ступень залежнасці Лукашэнкі ад Расіі не змяншаецца. І, улічваючы гэта, мы будзем непакоіцца яшчэ доўга. Але я не думаю, што цяпер ёсць нешта канкрэтнае, чым я асабліва занепакоены.
Чытайце таксама
