Падатковая знайшла ў беларуса «лішнія» грошы і запатрабавала заплаціць з іх падаходны. Той паспрабаваў растлумачыць, што частка сродкаў — гэта не даходы, а вяртанне доўгу, але яму не паверылі — давялося разбірацца ў судзе.
Інспекцыя па падатках і зборах пасля праверкі выявіла, што Генадзь (імя змененае) не менш чым 10 разоў за пяць гадоў атрымліваў сродкі з-за мяжы — ад 175 рублёў да амаль 35 тысяч даляраў за раз. Агулам сума перавысіла 120 тысяч даляраў, вынікае з дакумента, апублікаванага ў банку судовых рашэнняў.
Паколькі мужчына не падаваў падатковых дэкларацый на гэтыя сумы, яму выставілі да выплаты амаль 45 тысяч рублёў падаходнага.
Ён паспрабаваў аспрэчыць выстаўлены падатак з часткі сумы — 46 тысяч даляраў. Мужчына заявіў, што гэта было вяртанне доўгу. Гэтаму не паверылі ў падатковай і спагналі з яго збор. Тады мужчына пайшоў у суд. Там ён таксама патлумачыў, што пазычыў знаёмай 46,2 тысячы даляраў, і яна паступова іх вяртала. Аднак суддзя вырашыў, што гэтыя тлумачэнні «не ўтрымліваюць дакладнай інфармацыі, якая пацвярджае заключэнне і вяртанне сумы пазыкі».
Суд пацвердзіў законнасць рашэння падатковай службы, адхіліўшы скаргу Генадзя.
Чытайце таксама
