Аляксандр Лукашэнка збянтэжыўся зніжэннем папулярнасці рабочых прафесій сярод моладзі. Гэтае пытанне ён закрануў 21 студзеня на сустрэчы з працоўным калектывам МАЗа і прадпрыемстваў холдынгу «БЕЛАЎТАМАЗ». Паводле палітыка, многія з прадстаўнікоў новага пакалення імкнуцца стаць блогерамі або сысці ў IT, замест таго каб засвойваць такія спецыяльнасці, як, напрыклад, электрагазазваршчык. Аляксандр Лукашэнка таксама заявіў, што трэба актыўней прыцягваць на рынак працы тых, хто не працуе.
У Аляксандра Лукашэнкі спыталі, ці не прывядзе такая сітуацыя да вялікага дэфіцыту спецыялістаў рабочых прафесій.
«Насцярожанасць такая ёсць», — адказаў палітык і дадаў, што апошнім часам, напрыклад, на рынку працы ўзрастае патрэба ў зваршчыках, іншых рабочых спецыяльнасцях. Пры гэтым на сустрэчы з работнікамі МАЗа таксама звярталі ўвагу на тое, што «праблема дэфіцыту такіх работнікаў ужо адчуваецца даволі востра ў шэрагу дзяржаваў». «У Беларусі сітуацыя ў гэтым плане пакуль адносна паспяховая, хоць некаторыя насцярожвальныя працэсы ўсё ж праяўляюцца», — адзначае прэс-служба Аляксандра Лукашэнкі.
Палітык звярнуў увагу, што цяпер у краіне патрэбныя перш за ўсё спецыялісты для рэальнага сектара эканомікі, як, напрыклад, калектывы МАЗа і канцэрна «БЕЛАЎТАМАЗ», якія ствараюць рэальны прадукт. Але нейкіх канкрэтных рашэнняў на гэтую тэму пакуль няма.
Нагадаем, 9 красавіка 2024 года палітык ужо наракаў на дэфіцыт кадраў на заводах.
«Аляксандр Лукашэнка неаднойчы падкрэсліваў неабходнасць актыўнага прыцягнення да працы тых, хто не працуе. А такіх дагэтуль нямала нават у Мінску», — паведамляе ягоная прэс-служба. «Нам трэба разабрацца з гэтымі абуральнымі момантамі», — сказаў Аляксандр Лукашэнка.
Нагадаем, яшчэ 16 лістапада 2024 года палітык заявіў, што ў Беларусі не мусіць быць «бамжоў і дармаедаў». На яго думку, «усе павінныя варушыцца, працаваць, зарабляць на сябе і на сваю сям’ю». Раней чыноўнікі заяўлялі, што могуць увесці чарговыя абмежаванні для тых, хто трапіў у базу «дармаедаў».
Акрамя таго, ёсць патэнцыял для прыцягнення на рынак працы мігрантаў, якія прыбываюць у Беларусь, але тут мусіць быць вельмі ўважлівае стаўленне з боку працадаўцаў, лічыць палітык. «Вы бярыце іх на працу, але з кадравікамі прапрацуйце кожнага, вы за іх будзеце несці адказнасць, — папярэдзіў Аляксандр Лукашэнка. — Я не супраць, няхай людзі прыязджаюць, працуюць».