У Беларусь за 2024 год прыбыло больш за 33 тысячы працоўных мігрантаў, вынікае са звестак МУС. Гэта прыкладна ў 2,5 разу больш, чым у 2023-м. Пры гэтым актыўней за ўсё экспаты прыязджалі з Туркменістана. Нагадаем, у студзені гэтага года Аляксандр Лукашэнка заявіў, што трэба актыўней прыцягваць у нашую краіну працоўных мігрантаў.
Як паведамляецца, больш за 80% замежнікаў прынялі на працу па спрошчанай схеме, пры якой наймальніку не трэба атрымліваць на гэта дазвол. Нагадаем, у 2025 годзе ў Беларусі пашырылі спіс прафесій, па якіх можна працаўладкоўваць экспатаў без узгадненняў. Для гэтага дастаткова пісьмова паведаміць у падраздзяленне па грамадзянстве і міграцыі цягам трох працоўных дзён пасля заключэння працоўнай дамовы.
Паводле звестак МУС, амаль палову з агульнай колькасці прыбылых у 2024 годзе экспатаў складаюць грамадзяне Туркменістана. Следам размясціліся прыезджыя з Расіі, Кітая, Украіны, Узбекістана. Для параўнання: у 2020 годзе большасць экспатаў у Беларусь прыбыло з РФ.
Нагадаем, 16 студзеня гэтага года вырашыць праблему дэфіцыту працоўных кадраў за кошт працоўнай міграцыі прапанаваў Аляксандр Лукашэнка.
Больш за 13,5 тысячы чалавек з замежных работнікаў, якія прыбылі летась, — кваліфікаваныя спецыялісты. Яшчэ больш за 11 тысяч працуюць па рабочых спецыяльнасцях, каля 6,5 тысячы — у сферы абслугоўвання і гандлю.
Пры гэтым з Беларусі ў 2024 годзе, паводле звестак МУС, на заробкі выехала 3497 чалавек, большасць з іх — у Расію. Гаворка пра тых, хто выправіўся «па рубель» з дапамогай кампаній і ІП, якія аказваюць паслугі па працаўладкаванні за мяжой. У 2023-м было 4535 чалавек. Пры гэтым рэальная колькасць тых, хто з’ехаў на заробкі, можа быць прыкметна вышэйшай, бо ў тую ж РФ нашыя суайчыннікі часцяком выязджаюць, не паведамляючы міграцыйным службам.
Нагадаем, у Беларусі назіраецца дэфіцыт кадраў.
