Міністр замежных справаў Польшчы Радаслаў Сікорскі ў інтэрв'ю «Белсату» і праекту «Вот Так» паразважаў пра рэпрэсіі ў Беларусі, назваўшы іх «апошняй стадыяй таталітарнага рэжыму», і выказаўся пра магчымасць пераменаў у нашай краіне.
— Цяперашнія беларускія ўлады прывялі краіну да поўнай інтэграцыі ў вайсковай сферы з Расіяй. І мы ведаем, каму належыць галоўная роля ў такім зліцці. Сама сістэма Аляксандра Лукашэнкі вядзе да другаснай саветызацыі і аслабляе Беларусь. Польскія ўрады, якія змянялі адзін адзін, спрабавалі стварыць у Беларусі прастору для манеўравання паміж Еўропай і Расіяй. Часам гэта ўдавалася.
Напрыклад, былі часы, калі ў Беларусі не было палітычных зняволеных. І я асабіста спрабаваў гэта зрабіць сумесна з міністрамі Швецыі і Германіі. Я некалькі разоў быў у Мінску з прапановамі дапамогі — палітычнай і фінансавай — для руху ў бок дэмакратыі. Але мы ведаем, што апошнія выбары аказаліся поўным фарсам.
І на жаль, вельмі падобна, што Беларусі, як і ў выпадку з незалежнасцю ў 1990-я гады, давядзецца чакаць пераменаў у самой Маскве.
Такія адкрытыя рэпрэсіі — апошняя стадыя таталітарнага рэжыму. У Польшчы ў 1980-я гадах таксама здавалася, што сітуацыя безнадзейная, а праз некалькі гадоў надышла свабода. Гэтага ж мы зычым і Беларусі, — заявіў Сікорскі.
Паводле яго, Расія і Беларусь — «краіны, якія бяруць у закладнікі нявінных людзей і паводзяцца як тэрарысты»:
— Таму мы вядзём з імі такія ж перамовы, як з выкрадальнікамі. Перамовы пад кіраўніцтвам ЗША ўжо вядуцца. Яны могуць завяршыцца поспехам, але гэта ў любым выпадку доўгі і цяжкі працэс.
