Чытач «Люстэрка» 17 ліпеня ўбачыў у Рагачоўскім раёне вялікую колькасць грузавікоў і аўтобусаў з расійскімі нумарамі і чорнымі сцягамі, падобнымі да сцягоў ПВК Вагнера. «Калона была вельмі доўгая. Міма нас па трасе ішла больш за 10 хвілін», — адзначае чытач. Мы патэлефанавалі чыноўнікам Рагачоўскага раёна і Гомельскай вобласці, каб даведацца, што адбываецца.
— Мы з роднымі спалохаліся. Бачыць такую колькасць тэхнікі з расійскімі і чорнымі сцягамі з чарапамі было вельмі страшна, — дзеліцца ўражаннем чытач.
Як звычайны грамадзянін журналіст «Люстэрка» патэлефанаваў у райвыканкам, а таксама ў сельскія выканаўчыя камітэты, якія знаходзяцца на тэрыторыі раёна.
На гарачай лініі Рагачоўскага райвыканкама пра перамяшчэнне па тэрыторыі раёна калоны вайскоўцаў не ведалі.
— Вялікая калона была, хвілін 20 ехалі, сцягі з чарапамі нейкімі былі.
— Можа, байкеры нейкія паехалі, не ведаю. Я не маю такой інфармацыі, — адказаў дзяжурны.
У Дварэцкім сельскім выканаўчым камітэце перамяшчэнне калоны тэхнікі пацвердзілі.
— Не хвалюйцеся, гэта вагнераўцы паехалі на Асіповічы, — адзначылі ў сельвыканкаме.
— У нас яны не будуць затрымлівацца?
— Не, у іх там вызначанае месца дыслакацыі, не хвалюйцеся.
— Яны часта так будуць праз нашую вёску праязджаць?
— Без паняцця. Нас спецыяльна не апавяшчалі, я сама выпадкова ўбачыла.
Праезд калоны тэхнікі пацвердзілі і ў Гадзілавіцкім сельскім выканаўчым камітэце Рагачоўскага раёна.
— Праехала калона, так. Напэўна, вайскоўцы паехалі кудысьці, — патлумачылі ў сельвыканкаме.
— А гэта нашыя?
— Расійскія салдаты пераязджаюць з аднаго месца на іншае.
— Гэта вагнераўцы?
— Дакладна не скажу.
— Яны ў нас не застануцца?
— Праехалі міма нашага сельсавета. У нас іх няма.
Між тым, 17 ліпеня маніторынгавая група «Беларускі Гаюн» паведаміла, што гэта як мінімум трэцяя калона вагнераўцаў, якая прыбыла ў Беларусь. Відаць, менавіта яе і назіраў наш чытач. Паводле звестак маніторынгавай групы, яна рухаецца па трасе М5 ад Бабруйска ў напрамку вёскі Цэль Асіповіцкага раёна. А ў складзе калоны «як мінімум 20 машын розных мадыфікацый — УАЗ Патрыёт, пікапы, „буханкі“, будаўнічая тэхніка, аўтобусы, фуры».
Пра тое, што яшчэ адна калона вагнераўцаў 17 ліпеня рухаецца ў кірунку Масквы, паведаміла і «Медыязона». Выданне не выключае, што яна можа адправіцца ў Беларусь.
Нагадаем, пасля няўдалага мяцяжу ў Расіі расійскія ўлады заявілі, што заснавальнік ПВК Вагнера Яўген Прыгожын «сыдзе ў Беларусь». 11 ліпеня Мінабароны пацвердзіла хуткае прыбыццё наймітаў у Беларусь.
З’яўлялася інфармацыя пра тое, што сілы ПВК будуць дыслакаваныя на тэрыторыі закінутай вайсковай часткі ў вёсцы Цэль Асіповіцкага раёна, дзе пачалі будаўніцтва намётавага мястэчка.
Пазней у Мінабароны паведамілі, што гэты лагер прызначаны «для трэніроўкі як вайскоўцаў, так і прадстаўнікоў цывільнай адміністрацыі ў рамках разгортвання сістэмы тэрытарыяльнай абароны».
У пятніцу, 14 ліпеня, на дзяржаўным канале «ВаенТБ» паказалі сюжэт пра тое, як вагнераўцы на гэтым палігоне трэніруюць беларускіх вайсковаабавязаных.
Колькі байцоў ПВК Вагнера прыбыло ў краіну, Мінабароны не паведамляла.
Чытайце таксама
