Заснавальнік прыватнай ваеннай кампаніі Вагнера Яўген Прыгожын упершыню пасля няўдалага мяцяжу ў Расіі запісаў відэазварот. Ролік 21 жніўня распаўсюдзілі звязаныя з кіраўніком наймітаў тэлеграм-каналы.
У роліку Прыгожын не расказаў, дзе знаходзіцца. Кіраўнік наймітаў пазіраваў са зброяй на фоне афрыканскага пейзажу. Ён таксама згадаў тэмпературу +50 °С.
— ПВК Вагнер робіць Расію яшчэ больш вялікай на ўсіх кантынентах, а Афрыку — яшчэ больш свабоднай. Справядлівасць і шчасце для афрыканскіх народаў. Кашмарым ІДІЛ, Аль-Каіду і іншых бандосаў, — сказаў Прыгожын і запрасіў на працу «сапраўдных волатаў».
Нагадаем, Прыгожын 23 чэрвеня абвясціў пра «марш справядлівасці» на Маскву ў адказ на ўдар Мінабароны Расіі па «тылавых лагерах» ягоных байцоў. Раніцай 24 чэрвеня Прыгожын паведаміў, што яго найміты кантралююць вайсковыя аб’екты ў Растове-на-Доне. Прэзідэнт Расіі Уладзімір Пуцін выступіў са зваротам, у якім назваў тое, што адбываецца, здрадай. Мяцеж завяршыўся тым, што Яўген Прыгожын адмовіўся ад «паходу на Маскву» і пагадзіўся з’ехаць у Беларусь. Крымінальная справа па мяцяжы Прыгожына была спыненая 27 чэрвеня, яму таксама вярнулі ўсе канфіскаваныя падчас ператрусаў грошы, каштоўнасці і зброю.
12 ліпеня Мінабароны Расіі паведаміла, што найміты ПВК Вагнера перадалі ведамству тэхніку і ўзбраенне.
14 ліпеня Мінабароны Беларусі паказала, як вагнераўцы на палігоне недалёка ад лагера трэніруюць беларускіх вайсковаабавязаных. 17 ліпеня прыбыццё байцоў ПВК было пацверджанае з дапамогай спадарожнікавых здымкаў. Найміты размясціліся на тэрыторыі былой вайсковай часткі каля вёскі Цэль Асіповіцкага раёна Магілёўскай вобласці. Іх колькасць афіцыйна не называлася. Паводле звестак маніторынгавага праекта «Беларускі Гаюн» на 16 жніўня, іх можа быць 4500.
Чытайце таксама
