Паўднёвакарэйская спартоўка Кім Е Чы страціла прытомнасць на радзіме, паведамляе Reuters.
Інцыдэнт адбыўся ў Імсілі ў Паўднёвай Карэі. Там праходзіла прэс-канферэнцыя, прысвечаная Алімпіядзе. 31-гадовая Кім Е Чы ў Парыжы заваявала срэбны медаль у стральбе з пнеўматычнага пісталета на дыстанцыі дзесяць метраў.
Відаць, спартоўка страціла прытомнасць ад стрэсу і знясілення. Пазней стала вядома, што яна ачуняла і знаходзіцца ў бальніцы, дзе будзе аднаўляцца пасля таго, што здарылася.
Кім Е Чы атрымала шырокую вядомасць у сацыяльных сетках дзякуючы свайму вобразу. Прычым галоўным аб’ектам захаплення стала нават не алімпійскі выступ спартоўкі, а відэа, знятае падчас спаборніцтваў у траўні гэтага года. Тады Кім Е Чы пабіла сусветны рэкорд у стральбе з пнеўматычнага пісталета на 25 метраў.
Карыстальнікі сацсетак захапляліся яе стрыманымі паводзінамі і экіпіроўкай: акулярамі для стральбы а-ля Тэрмінатар і спартовым касцюмам. Прадстаўніца Паўднёвай Карэі нагадвала персанажа з баевіка. І нават на новы рэкорд яна адрэагавала з абсалютнай абыякавасцю. Відэа сабрала мільёны праглядаў.
The most «Main Character Energy» I’ve ever seen in my life.pic.twitter.com/ExuXVxB3VB
— Del Walker 🇵 (@TheCartelDel) July 30, 2024
На Кім Е Чы звярнуў увагу і заснавальнік Tesla і SpaceX Ілан Маск: «Яна мусіць зняцца ў баявіку. Граць не трэба!»
