Дзяржаўны канал АНТ паведаміў пра экстрадыцыю ў Беларусь затрыманага ў В’етнаме экс-байца палка Каліноўскага. Таксама раскрылі імя мужчыны. Ім аказаўся 34-гадовы Васіль Верамейчык, былы афіцэр беларускай арміі і баец ПКК, а таксама дэлегат Каардынацыйнай рады. Раней «Люстэрка» паведамляла пра затрыманне ў краіне Паўднёва-Усходняй Азіі аднаго з былых байцоў палка Каліноўскага.
У эфіры тэлеканала АНТ паказалі кадры экстрадыцыі ў Беларусь былога байца палка Каліноўскага Васіля Верамейчыка. Раней «Люстэрка» паведамляла пра затрыманне ў краіне Паўднёва-Усходняй Азіі мужчыны, што служыў у беларускім добраахвотніцкім фарміраванні. Мы не называлі яго імені і краіны затрымання па просьбе сяброў, якія баяліся яго экстрадыцыі.
Начальнік следчага ўпраўлення Камітэта дзяржбяспекі Беларусі Канстанцін Бычак паведаміў, што дэпартацыя Васіля Верамейчыка адбылася ў рамках міжнароднага супрацоўніцтва на запыт КДБ. Прычына — ён знаходзіцца ў вышуку праз службу ў палку Каліноўскага. Дакладных датаў затрымання і выдачы ён не назваў.
У тэлеграм-канале «Блок Пракоп’ева — Ягорава» (Верамейчык — дэлегат Каардынацыйнай рады ад гэтай фракцыі) паведамляецца, што, паводле інфармацыі мясцовай паліцыі, ён быў экстрадыяваны ў Беларусь 14 лістапада. Канал паведамляе, што фармальнай прычынай затрымання Верамейчыка была бойка.
Васілю Верамейчыку 34 гады, ён выпускнік Вайсковай акадэміі Беларусі, спецыялізацыя — ваенная псіхалогія і ідэалагічная праца ў войску. Служыў ва Узброеных сілах Беларусі, быў лейтэнантам запасу.
Пасля пратэстаў 2020 года Верамейчык з’ехаў ва Украіну, жыў у Львове. З першых дзён нападу Расіі Васіль пайшоў на фронт добраахвотнікам, потым далучыўся да палка Каліноўскага.
У верасні 2022 года Аляксандр Лукашэнка сваім указам пазбавіў Верамейчыка вайсковага звання. Пасля завяршэння службы ў палку Каліноўскага мужчына пераехаў з Украіны ў Літву. Але там яму адмовілі ў відзе на жыхарства праз ранейшую службу ў беларускім войску.
У траўні 2024 года Васіль Верамейчык быў абраны сябрам Каардынацыйнай рады 3-га склікання ад выбарчага спісу «Блок Пракоп’ева — Ягорава». Апошнім часам мужчына працаваў у сферы IT.
Чытайце таксама
