У пятніцу, 17 лістапада, у адной з гімназій Гродна на ўроку памерла шасцікласніца. Дзяўчынцы стала дрэнна, ёй аказвалі меддапамогу, але выратаваць яе не ўдалося, расказалі «Люстэрку» чытачы. Міністэрства адукацыі пра надзвычайнае здарэнне пакуль не паведамляла.
Як расказаў «Люстэрку» сваяк аднаго з вучняў, у гімназіі № 5 у Гродне памерла шасцікласніца. Дзяўчынцы было 12 гадоў. У гэтай установе адукацыі ёсць класы з харэаграфічным ухілам, і надзвычайнае здарэнне адбылося на ўроку танцаў.
— Наколькі я ведаю, у дзяцей штодня ўрокі танцаў, часам яны даўжэйшыя за дзве гадзіны, нагрузка вялікая, але дзецям падабаецца. Ну і ў пятніцу проста на ўроку дзяўчынцы стала дрэнна, яна памерла. Настаўнікаў пасля здарэння збіралі на нейкую нараду і, напэўна, сказалі, каб яны маўчалі. Бо бацькам пра гэта нічога ў школе не казалі — ні ў навінах, ні ў чатах інфармацыі няма. Але гэта абуральна — хоць бы патлумачылі прычыну, праінфармавалі бацькоў, каб хаця б яны ведалі, можа, дзесьці за здароўем дзяцей больш сачыць трэба, да доктара хадзіць часцей, калі такія нагрузкі, — расказаў суразмоўца.
Паводле яго, калі дзіцяці стала дрэнна, праводзіліся рэанімацыйныя дзеянні, імаверна, прыязджала хуткая, але выратаваць дзяўчынку не змаглі. Неафіцыйная прычына смерці — праблемы з сэрцам.
У гімназіі, куды журналістка «Люстэрка» патэлефанавала як мама адной з вучаніц, пацвердзілі: шасцікласніца памерла падчас урока.
— Стала дрэнна, страціла прытомнасць — і ўсё, дактары не змаглі адкачаць, аказаць дапамогу. Там у дзіцяці былі праблемы са здароўем, — патлумачылі ў адміністрацыі, падрабязнасці праз тэлефон расказваць адмовіліся.
Афіцыйна мясцовыя ўлады Гродна ці Міністэрства адукацыі пра надзвычайнае здарэнне з гібеллю дзіцяці на ўроку не паведамлялі. Пакуль не вядома, ці праводзіцца нейкая праверка.
Чытайце таксама
