У верасні 2024 года ў Бабруйску мінівэн праваліўся пад зямлю — людзі ледзь паспелі выскачыць з салона аўто. Камунальнікі назвалі прычынай здарэння зношаную каналізацыю. Гаспадар Renault расказаў выданню «Коммерческий курьер», што выдаткаваў на рамонт амаль 5 тысяч рублёў, а кампенсацыю атрымаў ад водаканала.
Паводле бабруйчаніна Аляксандра, пасля інцыдэнту «Магілёўаблводаканал» заключыў дамову з гандлёва-прамысловай палатай на правядзенне экспертызы, і неўзабаве пасля гэтага яму выплацілі «энную суму».
Дакладнага памеру кампенсацыі ён не назваў, але сказаў, што хапіла на рамонт і маральныя выдаткі. Рамантаваў аўтамабіль сам уладальнік, з улікам афарбоўкі працы абышліся амаль у 5 тысяч рублёў. Прадаваць аўтамабіль мужчына не плануе.
Нагадаем, мінівэн Renault днём 1 верасня праваліўся пад зямлю на паркоўцы ў Бабруйску. Усё адбылося ў раёне вуліцы Сацыялістычнай, 197/1. Спачатку пад зямлю сышло левае пярэдняе кола аўтамабіля, потым Renault праваліўся практычна цалкам. За некалькі імгненняў да гэтага людзі паспелі выйсці з машыны, уключаючы дзіця. Ніхто не пацярпеў.
Як растлумачыў галоўны інжынер «Магілёўаблводаканала» Аляксей Пудаў, у гэтым месцы праходзіць гаспадарча-фекальная каналізацыя, аднак камунікацыям ужо 35 гадоў — акурат тэрмін службы, то-бок яны паспелі знасіцца. Трубы таксама маглі пацярпець ад газавай карозіі.
«Сёлета мы планавалі іх замену, але з аб’ектыўных прычын тэрміны перанеслі на наступны. Праект ужо распрацаваны. Хоць, магчыма, сёлета нешта і атрымаецца зрабіць», — паведаміў камунальнік.