Кіраўніца Савета Рэспублікі Наталля Качанава выказалася, што павышэнне пенсій і дапамог залежыць ад таго, як будзе сфармаваны дзяржбюджэт. На фоне гэтай заявы «Люстэрка» паглядзела, якая сітуацыя з бюджэтам Фонду сацыяльнай абароны насельніцтва (ФСАН), з якога робяць гэтыя выплаты.
У бюджэт ФСАН у першым квартале гэтага года не патрабаваліся субвенцыі — уліванні з бюджэту краіны. «Фінансаванне пенсій і дапамог са сродкаў бюджэту фонду ў справаздачным перыядзе ажыццяўлялася своечасова і ў поўным аб’ёме», — паведамляецца на сайце фонду.
У студзені-сакавіку бюджэт ФСАН склаўся з прафіцытам 3 млрд 846,8 млн рублёў. Тут улічваюцца і рэшткі за мінулы год.
Канкрэтна па пенсіях прафіцыт склаў 137,5 млн рублёў, астатняе — сацстрахаванне (гэтыя грошы ў асноўным выдаткоўваюць на дапамогі на дзяцей).
Даходы ФСАН у першым квартале склалі 8 млрд 311,1 млн рублёў, а выдаткі — 7 млрд 551,3 млн рублёў.
«Утвораны прафіцыт па сродках дзяржаўнага сацыяльнага страхавання дазваляе самастойна выконваць усе задачы, якія стаяць перад фондам, — забяспечанне своечасовага і ў поўным аб’ёме фінансавання сацыяльных абавязанняў (пенсій і дапамог). У сувязі з гэтым субвенцыя з рэспубліканскага бюджэту на фінансаванне выдаткаў на выплату працоўных пенсій, дапамог для забяспечання збалансаванасці бюджэту фонду не прыцягвалася», — паведамляюць у ФСАН.
Нагадаем, працоўныя пенсіі сёлета падымалі з 1 лютага — у сярэднім на 10%. Раней міністр працы і сацыяльнай абароны Наталля Паўлючэнка анансавала, што ў 2025 годзе пенсіі вырастуць на 15%.
З 1 траўня паднялі мінімальныя працоўныя і сацыяльныя пенсіі. Іх памер прывязаны да памеру бюджэту пражытковага мінімуму.
Мінімальная пенсія па ўзросце пасля дабаўлення складае 115,65 рубля (сума без уліку даплаты ў 20% ад сярэдняй зарплаты). Гэта на 3,74 рубля больш, чым было раней. Да гэтай сумы прадугледжаная даплата.
Сацыяльная пенсія павялічылася з 1 траўня да 231,29 рубля. Гэта на 7,47 рубля больш, чым у красавіку. Гэтыя выплаты атрымліваюць у тым ліку тыя, хто трапіў у пенсійную пастку.
Чытайце таксама
