У Мінску сілавікі затрымалі 29-гадовую дзяўчыну за ўдзел у пратэстах. Падставай сталі яе фатаграфіі ў Tinder, дзе яна падчас аднаго з пратэсных маршаў 2020 года стаіць на дарозе з бел-чырвона-белым сцягам. Публікацыя пра затрыманне з’явілася ў адным з неафіцыйных тэлеграм-каналаў сілавікоў.
Паведамляецца, што дзяўчына працуе менеджарам лагістычнай кампаніі Trans Solutions. Сілавікі запэўніваюць, што хтосьці «зліў» яе фота з Tinder міліцыі, але праверыць гэтае сцверджанне немагчыма.
З дзяўчынай знялі «пакаяльнае» відэа, дзе яна пацвярджае свой удзел у пратэстах. Яна змешчаная ў ІЧУ, супраць яе распачалі крымінальную справу па арт. 342 КК (актыўны ўдзел у групавых дзеяннях, якія груба парушаюць грамадскі парадак).
Больш за тое, у тэлеграм-канале сілавікоў заявілі, што пасля затрымання мінчанкі дзве яе сяброўкі, з якімі яна хадзіла на маршы, паспрабавалі з’ехаць з Беларусі. Адной удалося выехаць у Турцыю, але другую 29-гадовую дзяўчыну затрымалі на мяжы з Польшчай. Паводле сілавікоў, яна працуе адміністрацыйным памочнікам у нейкай міжнароднай арганізацыі.