Магілёўскім праваабаронцам стала вядома, што ў горадзе 31 кастрычніка прайшлі масавыя затрыманні. Пазней з’явілася інфармацыя, што такое адбываецца па ўсёй краіне.
Паводле інфармацыі праваабаронцаў, затрымалі каля дзясятка чалавек. Абставіны высвятляюцца.
Акрамя таго, у Маладзечанскім раёне міліцыя ходзіць па людзях, якіх затрымлівалі пасля выбараў 2020 года, паведамляў праваабарончы цэнтр «Вясна». Паводле папярэдняй інфармацыі, ва ўчастковых ёсць спісы такіх беларусаў і беларусак — па чарзе наведваюць іх па месцы жыхарства.
Таксама стала вядома, што ў сярэдзіне кастрычніка ў Беразіне на Міншчыне праходзілі ператрусы. Сярод іншага, сілавікі прыйшлі і ў кватэру былога добраахвотніка палка «Пагоня» Паўла Мігаля.
Пазней «Вясна» паведаміла, што праваабаронцам вядома, што затрыманні адбываюцца па ўсёй Беларусі.
«Яны выглядаюць як спланаваная акцыя запалохвання перад выбарамі. Сілавікі прыходзяць у асноўным да тых, хто раней затрымліваўся па пратэсных адміністрацыйных артыкулах. Вядома пра выпадкі жорсткіх затрыманняў, з неабгрунтаваным ужываннем сілы», — расказалі ў «Вясне».
Ёсць інфармацыя пра затрыманні людзей, якія вярнуліся з-за мяжы.
«Памятайце пра правілы бяспекі, асабліва па вяртанні ў Беларусь. Не захоўвайце фота з акцый пратэсту, каб не нашкодзіць сабе і іншым удзельнікам і ўдзельніцам пратэстаў. Таксама ўважліва прагледзьце падпіскі ў сваіх усіх сацсетках на наяўнасць „экстрэмісцкіх“ старонак», — нагадалі праваабаронцы.
Нагадаем, 31 кастрычніка паведамлялася пра масавыя праверкі і затрыманні ў Смаргоні і Ваўкавыску. Гаварылася таксама пра выпадкі ў Мінску і Гомелі.