Прадаўцы з Кавалерыйскага рынку ў Беластоку (Польшча) паскардзіліся намесніку прэзідэнта горада Марку Масальскаму на праблемы праз адсутнасць пакупнікоў. Яны дабіваюцца мадэрнізацыі рынку, зніжэння арэнднай платы і адкрыцця пунктаў пропуску на мяжы з Беларуссю, піша MOST.
Кавалерыйскі рынак — адзін з найбуйнейшых у паўночна-ўсходняй Польшчы. Доўгі час значную частку яго наведнікаў складалі беларусы, якія прыязджалі «на закупы». Але з закрыццём мяжы колькасць пакупнікоў знізілася.
— На рынку няма кліентаў, яны не прыходзяць, і тут праблема ў закрытай мяжы. Мы так раскіданыя па гэтым базары, што хтосьці, прыйшоўшы сюды, можа проста спалохацца, убачыўшы, як гэта выглядае, — сказала на сустрэчы адна з прадпрымальніц, яе словы прыводзіць Radio Białystok.
З цяперашнім патокам пакупнікоў нават акупляць гандлёвыя месцы праблематычна. Адна з прадпрымальніц расказала, што за арэнду павільёна плаціць у месяц 580−590 злотых (140−142 даляры. — Заўв. «Люстэрка») плюс зямельны падатак у бюджэт горада, а «нагандляваць на гэта — праблема».
Хоць прадаўцы даўно настойваюць на тым, што рынак выратуе аднаўленне плыні пакупнікоў з Беларусі, улады разглядалі больш рэалістычныя спосабы. Перш за ўсё мадэрнізацыю — меркавалася, што так на яго ўдасца завабіць польскіх кліентаў. Абнаўленне абмяркоўваецца даўно, але пакуль прадаўцы незадаволеныя. Яны гавораць пра будаўніцтва праходаў, мадэрнізацыю інфраструктуры — хаця б прыбіральняў.
Першыя рашэнні пра будучыню рынку ўдзельнікам абяцалі прыняць на наступнай сустрэчы.